Home

STATUTI

STATUTI I PARTISË SHQIPTARE DEMOKRISTIANE TË KOSOVËS

Neni 1

DISPOZITAT E PËRGJITHSHME

Partia Shqiptare Demokristiane e Kosovës është parti politike kombëtare e qendrës se djethtë, e themeluar me qëllim që të realizojë synimet dhe detyrat sipas Programit dhe Statutit të saj.

Neni 2

Emri i Partisë është Partia Shqiptare Demokristiane e Kosovës (në tekstin e mëtejmë PSHDK), e themeluar më 4 nëntor 1990 në Gjakovë. Selia e PSHDK-së është e vendosur në kryeqytetin e Republikës se Kosovës, në Prishtinë. Me këtë emër nuk mund të formohet e as të paraqitet asnjë parti ose organizatë tjetër përveç kësaj. PSHDK-ja është e regjistruar fillimisht në Regjistrin e partive politike të Ministrisë së Drejtësisë të Republikës së Kosovës me numër rendor protokolar 001/92, datë 2 maj 1992 dhe e konfirmuar në Regjistrin e OSB-s (OSCE-s) në Prishtinë, me datë 21 gusht 2000 me numër rendor protokolar 100-0800 e në bazë të Rregullorës 2000/16.

Neni 3

PSHDK është parti me orientim evroperëndimor, programi i së cilës bazohet në ruajtjën e traditës, identitetit dhe vlerave të trashëgimisë kulturore të popullit shqiptar.

PSHDK i miraton dhe zbaton standardet evropiane dhe ardhmërinë e Kosovës e sheh në integrimin e Evropës demokratike.

Neni 4

PSHDK vepron në territorin e Kosovës.

PSHDK vepron edhe jashtë shtetit, në pajtim me Rregullorën, të cilën Kryesia e PSHDK-së ia propozon për miratim Këshilli Qendror të PSHDK-së.

Neni 5

PSHDK-në e përfaqëson kryetari i saj dhe personat e autorizuar nga kryetari.

Neni 6

PSHDK-ja ka vulën, stemën dhe flamurin e vet.

Stema dhe flamuri kanë formën e hapësirës katërkëndëshe me sfond të kaltërt, në qendër të së cilës është simboli kombëtar, shqiponja dykrerëshe me krah të hapur, ngjyrë të zezë, në fushë të kuqe, e rrethuar me 12 yjë pesëkëndësh ngjyrë të verdhë, sipas numrit të anëtarëve të Unionit Evropian në vitin e themelimit të PSHDK-së, në katër këndet e simbolit të së cilës janë inicialet e emrit të Partisë, duke filluar në drejtim të akrepave prej orës 9.

PSHDK-ja ka xhirollogarinë e vet.

Neni 7

PSHDK-ja bashkëpunon me partitë që veprojnë aktivisht në Republikën e Kosovës.

PSHDK mund të hynë në koalicion me ato parti të cilat kanë program për ndërtimin dhe zhvillimin demokratik të shtetit të Kosovës.

PSHDK-ja do të bashkëpunojë me Unionin Demokristian Evropian, me Internacionalen Botërore Demokristiane dhe me asociacionet tjera politike dhe parlamentare demokratike ndërkombëtare.

Neni 8

Anëtar i PSHDK-së mund të jetë çdo qytetar-individ që ka mbushur 18 vjet, i cili deklaron se i pranon qëllimet dhe detyrat që rrjedhin nga Programi dhe Statuti i PSHDK-së, respektivisht 16 vjet për t’u anëtarësuar në degët e Forumit të Rinisë Shqiptare Demokristiane.

Anëtari i PSHDK-së i cili posedon librezën e Partisë duhet të paguaj anëtarësinë.

Pamjen dhe përmbajtjen e librezës dhe shumën vjetore të pagesës së anëtaresisë e përcakton Këshilli Qendror me propozim të Kryesisë të PSHDK-së.

Anëtarit të PSHDK-së i ndërpritet anëtarësimi në Parti pas deklaratës së tij me shkrim ose me gojë se nuk dëshiron të jetë mëtej anëtar i saj.

Anëtari largohet nga Partia për shkak të qëndrimit ose veprimit të tij kundërprogramor e kundërstatutar, si dhe kundër vendimeve e qëndrimeve të Kryesisë së PSHDK-së.

Masën ndëshkimore e paraqet kryetari i PSHDK-së në Kryesi apo edhe Kryesia në konsultim me Kryesinë e Bashkësisë së Degëve. Vendimi merret me shumicën e votave në mbledhje të Kryesisë kur ka kuorum.

Ankesa ndaj kësaj mase i drejtohet Kuvendit të PSHDK-së përmes sekretarit të Kryesisë në afat prej 30 ditësh prej datës së marrjes së vendimit përkatës.

Neni 9

ORGANIZIMI I PARTISË

Organet e PSHDK-së janë: Kuvendi, kryetari i Partisë, Kryesia, Këshilli Qendror, Kryesia e bashkësisë së degëve, degët dhe këshillat e Partisë.

Neni 10

KUVENDI I PSHDK-së

Kuvendi i PSHDK-së, si organ më i lartë i Partisë, ka këto kompetenca:

  • nxjerr Programin dhe Statutin e PSHDK-së,
  • zgjedh dhe shkarkon kryetarin e PSHDK-së,
  • zgjedh dhe shkarkon Kryesinë e PSHDK-së,
  • miraton Statutin dhe Programin e PSHDK-së,

Kryetari i PSHDK-së i propozon Kuvendit anëtarët e Kryesisë duke marrë parasysh edhe propozimet e Bashkësive të degëve.

Kryesinë, prej më shumë kandidatëve se sa zgjedhën, e zgjedhë Kuvendi me vota të fshehta ose me aklamacion, si të deklarohet Kuvendi.

Për anëtar të Kryesisë mund të propozohet çdo anëtar i Partisë që jeton dhe vepron në Kosovë. Kryetarët e Bashkësive të Degëve të PSHDK-së në diasporë mund të jenë anëtarë të Kryesisë së PSHDK-së, kurse mungesa e tyre në mbledhjet e Kryesisë nuk llogaritet në kuorum, njëherit edhe janë drejtëpërdrejt delegatë të Kuvendit të PSHDK-së.

Kuvendi i PSHDK-së merr vendim për regjistrimin, çregjistrimin, bashkimin ose fuzionimin e PSHDK me ndonjë parti tjetër politike shqiptare në Kosovë, si edhe për shuarjen me votimin e ¾ të delegatëve të Kuvendit të  PSHDK-së.

Kuvendi shqyrton dhe miraton Raportin e Punës, Programin financiar dhe Llogarinë përfundimtare të PSHDK-së.

Kuvendi shqyrton dhe merr vendime përkatëse lidhur me ankesat e anëtarëve ndaj të cilëve janë shqiptuar masa ndëshkimore.

Kuvendi merr edhe vendime të tjera sipas Rregullorës për punën e Kuvendit.

Neni 11

Mbledhjen e punës së Kuvendit, të Kuvendit të rregullt zgjedhor dhe të Kuvendit të jashtëzakonshëm e thërret kryetari, ose Kryesia apo edhe Këshilli Qendror i PSHDK-së.

Kryetari, ose Kryesia, apo Këshilli Qendror e thërret Kuvendin e jashtëzakonshëm dhe në bazë të kërkesës të arsyetuar me shkrim dhe të nënshkruar nga më së paku 1/3 (një e treta) e delegatëve të Kuvendit të PSHDK-së, të cilët e nënshkruajnë kërkesën e tyre.

Mbledhjen e Kuvendit të PSHDK-së e udhëheqë kryetari i Partisë, e në mungesë të tij e udhëheqë njëri nga nënkryetarët, sekretari, apo personi të cilin e cakton kryetari i Kryesisë së PSHDK-së.

Kuvendi mban mbledhje të rregullta parimisht një herë në vit, kurse mbledhjen e Kuvendit zgjedhore në çdo 4 vjet.

Në rast nevoje mund të thirret Kuvendi i jashtëzakonshëm.

Kandidatët për deputet të Parlamentit të Kosovës i propozon Kryesia e Partisë duke marrë parasysh propozimet që vijnë nga Bashkësitë e Degëve dhe të Këshilli Qendror të  PSHDK-së, ndërsa kandidatët për Kuvendet Komunale i zgjedhin Bashkësitë e degëve në komunat përkatëse në konsultim me Kryesinë Qendrore.

Neni 12

Kuvendin e PSHDK-së e përbëjnë delegatët e zgjedhur në kuvendet e Bashkësive të degëve në Kosovë dhe diasporë me mandat katërvjeçar dhe anëtarët e Kryesisë së PSHDK-së me mundësi të rizgjedhjes.

Numrin e delegatëve e cakton Kryesia e PSHDK-së, që ia propozon Këshillit Qendror dhe pas konsultimeve të arritura Kryesia e përgatit materialin zyrtar të kompletuar për Kuvendin e PSHDK-së.

Delegatët për Kuvend propozohen nga degët e PSHDK-së, të cilët Kryesitë e Bashkësisë së Degëve, konform numrit të përgjithshëm të delegatëve, i zgjedhin kandidatët e vet dhe ia propozojnë Kryesisë Qendrore për Kuvend.

Ky rregull vlen edhe për Bshkësitë e Degëve në diasporë.

Kriteret për zgjedhjen e delegatëve për Kuvendin e PSHDK-së i përcakton Kryesia e PSHDK-së me vendim të posaçëm, parimisht në bazë të numrit të degëve në komunë, por para se gjithash, duke respektuar parimin territorial.

Neni 13

Detyrat e Kuvendit të PSHDK-së:

Kuvendi i PSHDK-së punon në mënyrë të plotfuqishme nëse ka kuorum gjysmën plus 1 delegatë, nga numri i delegatëve të zgjedhur.

Vendimet në Kuvend merren me shumicën e votave të delegatëve të pranishëm në Kuvend.

Kryetarin e PSHDK-së e zgjedhë dhe e shkarkon Kuvendi i PSHDK-së.

Kandidati apo kandidatët për kryetar të PSHDK-së, është-janë i-të obliguar që 30 ditë para mbajtjes së Kuvendit, të paraqesinë kandidaturën për kryetar të PSHDK-së në formën e shkruar në Kryesinë e BD-PSHDK-së, bashkangjitur edhe Programin (planin dinamik) të punës të specifikuar me afate kohore gjatë mandatit katër vjeçar, e cila Kryesi e BD-PSHDK-së, ia propozon Kryesisë Qendrore për Kuvend zgjedhor të PSHDK-së.

Kandidati apo kandidatët e propozuar për kryetar të PSHDK-së, si më lartë, janë të obliguar, që para fillimit të votimit, t’i paraqiten Kuvendit të PSHDK-së.

Kryetari i PSHDK-së zgjedhet nëse ka marrë më shumë se 50% të votave nga delegatët e pranishëm në Kuvend.

Nëse në rrethin-raundin e parë nuk e fiton shumicën e duhur të votave, atëherë dy kandidatët të cilët kanë marrë numrin ma të madh të votave, hyjnë në votim në rrethin e dytë dhe kandidati i cili fiton shumicën e numrit të votave, zgjedhet.

Kryetari zgjedhet me mandat katër vjeçar me të drejtë rizgjedhje.

Kuvendi i zgjedhë dhe e cakton numrin e anëtarëve të Kryesisë së PSHDK-së.

Kryesia e PSHDK-së përbëhet nga 21 anëtarë, sipas këtij Statuti.

Kryesia zgjedhet me mandat katër vjeçar me të drejt rizgjedhje.

Neni 14

KRYESIA E PSHDK-së

Kryesia e PSHDK-së është organi më i lartë ekzekutiv i PSHDK-së, e cila vepron mes dy kuvendeve zgjedhore. Kryesia e cakton numrin e anëtarëve të nënkryetarëve.

Kryesia, me propozimin e kryetarit, zgjedhë nga radhët e veta 2-3 nënkryetarët e rradhës, sekretarin, zëdhënësin dhe arkëtarin, me vota të fshehta, ose me aklamacion.

Zëdhënësi dhe arkëtari marrin pjesë në mbledhjet e Kryesisë por pa të drejt vote.

Në punën e Kryesisë, sipas nevojës, mund t marrin pjesë edhe persona të tjerë, të cilët janë anëtarë të partisë, por pa të drejtë vote.

Mbledhjet e Kryesisë mund të mbahen nëse është e pranishme shumica e anëtarëve të Kryesisë, kurse vendimet e Kryesisë miratohen me shumicen e votave të anëtarëve prezent, nëse me këtë Statut nuk është përcaktuar ndryshe.

Kryesia zbaton vendimet e Kuvendit, shqyrton dhe vendos mbi çështjet themelore politike, përpos ato të fushëveprimit të Kuvendit dhe të Këshillit Qendror, të përcaktuara me këtë Statut.

Kryesia i propozon Këshillit Qendror për vendimet mbi çështjet themelore të PSHDK-së.

Kryesia i propozon Këshillit Qendror strategjinë parazgjedhore të Partisë.

Kryesia i propozon Këshillit Qendror strategjinë në raste të kooalicioneve të mundshme para dhe pas zgjedhore.

Kryesia, me propozim të kryetarit, emron dhe shkarkon: zëdhënësinë dhe arkëtarin e PSHDK-së.

Nga radhët e veta Kryesia zgjedhë këshillat profesionale dhe kryetarët e tyre.

Kryetarët e këshillave i propozojnë anëtarët e këshillave të cilët i zgjedh Kryesia.

Kryesia së paku një herë në muaj takohet me kryetarët e bashkësive të degëve.

Kryetari me Kryesinë, koordinon punën e Këshillit Qendror dhe së paku një herë në çdo gjashtë muaj thërret mbledhje. Në mbledhje është e obligueshme pjesëmarrëja e Kryesisë.

Kryetari përcakton, udhëheqë dhe koordinon aktivitetin e të gjitha niveleve partiake në zbatimin e qendrimeve dhe aktiviteteve partiake konform këtij Statuti.

Shqyrton dhe vendos për punët e përditëshme dhe udhëheq afarizmin materialo-financiar të partisë.

Kryesia e PSHDK-së vepron sipas Rregullorës të cilën vetë e miraton, por gjithmonë  konform Statutit të Partisë.

Kryesia harton raportin e punës dhe ia propozon Këshillit Qendror një muaj përpara mbajtjes së Kuvendit të PSHDK-së, që mandej të jetë tërësisht i përpunuar dhe i detajuar për t’ia paraqitur Kuvendit të Partisë.

Kryetari së bashku me Kryesinë përgatit Kuvendin e PSHDK-së.

Në raste të jashtëzakonshme Kryesia kryen punët përgatitore për mbajtjen e Kuvendit, për të cilat e njofton Kuvendin në seancën e jashtëzokonshme, konform nenit 15 të këtij Statuti

Vendimet e Kryesisë merren me deklarimin pozitiv të shumicës së anëtarëve të pranishëm në mbledhje.

Vendimet merren me aklamacion ose me vota të fshehta.

Mandati i anëtarëve të Kryesisë zgjatë 4 vjet, me mundësi të rizgjedhjes.

Kryetari i Forumit të Rinisë së PSHDK-së dhe i Forumit të Gruas të Partisë, janë anëtarë të Kryesisë Qendrore sipas funksionit.

Kryetari dhe anëtarët e Kryesisë të PSHDK-së dhe kryetarët e nënkryetarët dhe sekretari i BD-PSHDK-së, konform këtij Statuti, kanë të drejtë në kompezimin material mujor sipas Rregullorës së aprovuar nga Kryesia e PSHDK-së për punën e tyre partiake.

Kryesia, bazuar në Rregullorën e punës të miratuar nga ky organ ekzekutive i partisë, siguron shpenzimet materiale për të gjitha zyret dhe aktivitetet zyrtare të Bashkësive të Degëve të PSHDK-së që veprojnë aktivisht në Republikën e Kosovës.

Anëtarit të Kryesisë mund t’i pushojë funksioni edhe para skadimit të mandatit të paraparë, si në këto raste:

  • me dorheqjen e tij me shkrim apo me gojë,
  • për shkak të angazhimit në punë të tjera që ia bëjnë të pamundur kryerjen me rregull të funksionit të anëtarit të Kryesisë,
  • për shkak të ndërrimit të domicilit-vendbanimit i cili ia bënë të pamundur kryerjen e funksionit të rregullt të punës partiake,
  • për shkak të mungeses së pajustifikuar, afatin e së cilës e cakton Kryesia me Rregullorën e punës së Kryesisë.
  • për shkak të moszbatimit të detyrave të cilat ia cakton Kryesia,
  • për shkak të qëndrimeve dhe veprimeve të tij që bien ndesh me qendrimet dhe politikën e Partisë e të Kryesisë,
  • për shkak të shkeljes së rëndë të Statutit dhe Programit PSHDK-së dhe
  • për shkak të sëmundjes së rëndë,

Neni 15

KRYETARI I PSHDK-së

Kryetari i Partisë është autoriteti më i lartë i Partisë pas Kuvendit, i cili ka të drejta dhe përgjegjësi të veçantë për mirëvajtjen e Partisë.

  • ndërmerr masa në të gjitha vendimet dhe qendrimet e të gjitha organeve të Partisë kur ato nuk i përmbahen Statutit, programit, vendimeve dhe qendrimeve të Kuvendit dhe të Kryesisë së PSHDK-së, 
  • Kryetari i PSHDK-së këtë parti e përfaqëson brënda dhe jashtë vendit.
  • Kryetari autorizon persona-grupe të delegacionëve të partisë për takime, vizita të punës brenda dhe jashtë shtetit, konform nenit 5 të këtij Statuti,
  • cakton dhe udhëheqë mbledhjet e Kuvendit, Kryesisë dhe Këshillit Qendror,
  • nënshkruan të gjitha vendimet dhe aktet e PSHDK-së,
  • autorizon nënkryetarët, sekretarin, zëdhënësin dhe arkëtarin për punët nga kompetenca e tyre, sipas këtij Statuti.
  • Kryetari me shkrim cakton zëvendësin, që në emër të tij të përfaqëson Partinë për punët e saj zyrtare konform autorizimit të kryetarit,
  • në rast të mungesës dhe pengesës fizike, kohore dhe shëndetësore, kryetarin e PSHDK-së e zëvëndëson, zëvëndësi i autorizuar me shkrim,
  • në rast të sëmundjes së rëndë-vdekjes apo të dorëheqjes se kryetarit, atë e zëvëndëson nënkryetari i parë dhe atë mandat e ka deri në kuvendin e rregullut apo të jashtëzakonshëm.
  • Vendimin për mbajtjen e Kuvendit të jashtëzakonshëm e përcakton Këshilli Qendror me propozimin e Kryesisë së PSHDK-së, në afat prej 30 ditësh, në të cilin Kuvend do të zgjidhet kryetari i PSHDK-së.

Neni 16

Në rast të zbatimit të dispozitave të nenit të 14 dhe 15, Kryesia bënë kooptimin e anëtarit të ri të Kryesisë.

Numri i anëtarëve të kooptuar në Kryesi nuk mund të jetë më i madh se 1/4 (një e katërta) e anëtarëve të saj.

Kooptimi i anëtarit të rinj të kryesisë bëhet nga rradha e BD-PSHDK-së, e cila Bashkësi e propozon zëvëndësuesin, ndërsa kryesia e PSHDK-së e miraton me vendim.

Neni 17

Mandati i anëtarëve të kooptuar ndërmjet dy kuvendeve zgjatë deri në Kuvendin e parë zgjedhor, me mundësi të rizgjedhjes.

Neni 18

Kandidatin e ri për anëtar të Kryesisë e propozon kryetari i PSHDK-së, pasi të konsultohet me Bashkësinë e degëve përkatëse me PSHDK-në, të cilin e zgjedh kryesia me shumicë votash.

Neni 19

Me autorizimin e kryetarit, çdo anëtar i Kryesisë dhe i Bashkësisë së degëve mund ta përfaqësojë Partinë brenda dhe jashtë vendit për ndonjë punë konkrete, konform nenit 15.  Autorizimi i tillë duhet të jetë me shkrim dhe i detajizuar.

Neni 20

SEKRETARI I PSHDK-së

  • koordinon punën e Kryesisë, të Kuvendit, të Këshillit Qendror dhe të Këshillave të PSHDK-së- udhëheqë punët administrative të PSHDK-së
  • nënshkruan dhe protokolon aktet e PSHDK-së nga kompetenca e vet
  • pranon shkresa e dokumente që i dërgohen Kryesisë
  • ruan dhe kompleton administratën dhe arkiven e Partisë
  • udhëheqë me personelin administrativ të PSHDK-së
  • kryen edhe punë të tjera të Kryesisë me interes nga kompetencat e tij
  • mban vulën e Partisë dhe mban përgjegjësinë për përdorimin e saj
  • kjo vlenë edhe për sekretarët e Bashkësive të degëve

Neni 21

KËSHILLI QENDROR I PSHDK-së

Këshilli Qendror i PSHDK-së është organ mbikëqyrës i Kryesisë së PSHDK-së, i cili zgjedhet nga Kuvendi zgjedhor i PSHDK-së.

Këshilli Qendror përbëhet nga 53 anëtarë. Atë e përbëjnë: Kryesia e PSHDK-së prej 21 anëtarëve, kryetarët e BD, në mungesë të tyre, njëri nga nënkryetarët, apo sekretarët e Kryesive të BD të PSHDK-së, të Forumit të Rinisë dhe të Forumit të Gruas së PSHDK-së dhe anëtarëve të tjerë të propozuar nga BD, PSHDK-ja dhe Kryesia e PSHDK-së.

Të gjithë këta zgjedhen në kryesitë e degëve, kryesitë e Bashkësive të Degëve, që konfirmohen në Kryesinë Qendrore dhe që i aprovon Kuvendi zgjedhor i PSHDK-së.

Mbledhjet e Këshillit Qendror i cakton kryetari i PSHDK-së, në mungesë të tij, njëri nga nënkryetarët, i cili është i autorizuar me shkrim-rregullisht një herë në gjashtë muaj, e në bazë të rrethanave të krijuara edhe mbledhje të jashtëzakonshme.

Mbledhja e jashtëzakonshme e Këshillit Qendror mund të mbahet me kërkesën me shkrim të shumicës së anëtarëve të Këshillit Qendror (51%) drejtuar kryetarit të PSHDK-së dhe Kryesisë Qendrore.

  • Këshilli Qendror analizon punën e Kryesisë dhe rekomandon alternativa të ndryshme për avancimin e punëve dhe aktiviteteve të partisë, konform Statutit dhe Programit politik të PSHDK-së,
  • kujdeset për realizimin dhe zbatimin e vendimeve të Kuvendit nga Kryesia dhe të vendimeve të Kryesisë së PSHDK-së,
  • përcakton propozimin për plotësim ndryshimin e Statutit dhe Programit dhe ia paraqet Kryesisë që në Kuvendin e PSHDK-së, të aprovohet,
  • përcakton shumën e pagesës se anëtarëve të partisë për çdo vit kalendarik,
  • është i autorizuar të bëjë ndryshimin-plotësimin e dispozitave të Statutit, nëse ai  ndryshim apo plotësimi është i nevojshëm konform Kushtetutës së Rrepublikës së Kosovës dhe ligjeve të aplikueshme në fuqi,
  • njoftohet nga Kryesia e PSHDK-së për të gjitha mjetet materialo-financiare qoft ato në formën e donacioneve, ato nga shteti, apo edhe nga format e tjera të krijimtarisë se saj brenda vitit kalendarik,
  • mbledhjet e Këshillit Qendror mund të mbahen nëse është e pranishme shumica e anëtarëve të këtij organi të Partisë, kurse vendimet e këtij Këshilli janë valide nëse miratohen me shumicën e votave të anëtarëve të pranishëm në mbledhje.

Këshilli Qendror ka të drejtë në mëditje, për takimet zyrtare të partisë, të rregulluara me Rregullore të Kryesisë PSHDK-së.

Këshilli Qendror vepron sipas Statutit që e aprovon Kuvendi i PSHDK-së.

Këshilli Qendror zgjedhet në Kuvendin zgjedhor të PSHDK-së dhe ka mandat dy-katër vjeçar, me mundësi rizgjedhje.

Neni 22

SENATI I PSHDK-së

Senatorët zgjidhen nga Kryesia e PSHDK-ës, me propozim të kryetarit, Kryesisë, anëtarëve të Kryesisë dhe kryetarit të Senatit të Kryesive të Degëve të PSHDK-ës.

Numri i senatorëve është i pa kufizuar.

Me rregullore Kryesia e PSHDK-ës përcakton fushëveprimtarinë e Senatit si dhe përcakton kriteret për emrimin e senatorëve.

Neni 23

KËSHILLAT E PSHDK-së janë:

  1. Këshilli për çështje Juridike-Statutare
  2. Këshilli për çështje ekonomiko-financiare
  3. Këshilli për arsim, shkencë, kulturë, rini e sport
  4. Këshilli për çështje shëndetësore dhe politikë sociale
  5. Këshilli për çështje të zhvillimit bujqësisë dhe viseve rurale
  6. Këshilli për energjetikë, mbrojtje të mjedisit dhe ekologji
  7. Këshilli për mbrojtje dhe siguri
  8. Këshilli për çështje politike të kuadrave
  9. Këshilli për informim dhe propagandë
  10. Këshilli për marrëdhënie me jashtë

Kryesia e PSHDK-së mund ta shtojë ose zvogëlojë numrin e këshillave sipas nevojës.

Neni 24

Çdo Këshill i PSHDK-së përbëhet nga kryetari i Këshillit dhe 4 anëtarëve të Këshillit nga përbërja e Këshillit Qendror, e që i zgjedhë Kryesia e PSHDK-së, me propozimin e kryetarit të këshillit përkatës.

Në mungesë të kryetarit, mbledhjen e Këshillit e udhëheq anëtari të cilin e cakton Këshilli.

Fushëveprimi i këshillave rregullohet me akte të posaçme të cilat i miraton Kryesia e PSHDK-së.

Neni 25

FORMAT THEMELORE TË ORGANIZIMIT TERRITORIAL TË PSHDK-së

  • Nëndegët.
  • Degët.
  • Bashkësistë e degëve.
  • Forumi i Rinisë së PSHDK-së.
  • Forumi i Gruas së PSHDK-së.

Format organizative të Partisë janë:

Nëndegët dhe degët që veprojnë në teritorin e caktuar.

Nëndega përbëhet prej më së paku 26 anëtarëve të PSHDK-së, kurse dega në Kosovë prej 51 anëtarëve, përkatësisht 26 anëtarëve në diasporë.

Kuvendi i degës zgjedh Kryesinë me vota të fshehta apo me aklamacion.

Numrin e anëtarëve të Kryesisë së degëve e cakton vet Kryesia e degës.

Kryesia e degës nga radhët e veta zgjedhë: kryetarin, nënkryetarët, sekretarin, arkëtarin dhe udhëheqësit e këshillave të degës.

Të gjithë udhëheqësit e zgjedhur kanë mandat 4 vjeçar, me mundësi të rizgjedhjes.

Këshillat e degëve bashkëveprojnë dhe janë në bashkëpunim me Kryesinë e BD të PSHDK-së.

Kryesia e degës mund të formojë nëndegë të reja në marrëveshje me Kryesinë e Bashkësisë së degëve.

Neni 26

BASHKËSIA E DEGËVE

Një Bashkësi e Degëve mund të ketë më së paku tri (3) degë në një njësi administrative (komunë)

Bashkësia e Degëve përbëhet nga anëtarët e Kryesive të degëve apo përfaqësuesit e caktuar nga Kryesitë e degëve.

Kryesia e BD-PSHDK-së mund të ketë më së paku 7 anëtarë, ndërsa maksimum 15 anëtarë të Kryesisë së BD-PSHDK-së. Ky numër mund të ndryshojë varësisht nga numri i degëve në territorin e caktuar.

Organi më i lartë i BD është Kuvendi, që mahet një herë në katër vjet.

Kuvendi i BD mund të mbahet edhe sipas nevojes me vendimin e Kryesisë Qendrore, pasi që të konsultohet me Këshillin Qendror. 

Kuvendi i Bashkësisë së degëve zgjedhë Kryesinë e BD të PSHDK-së.

Kryetar i BD-ve zgjedhet kandidati i cili i merr shumicën e votave nga delegatët e pranishëm në kuvend, ndërsa Kryesia me propozimin e kryetarit të BD-PSHDK-së zgjedh nga rradhet e veta 3 nënkryetarët, sekretarin dhe arkëtarin. Kryesia e BD të PSHDK-së zgjedhë delegatët për Kuvendin e PSHDK-së, të propozuar nga kuvendet e degëve. Kryesia e Forumit të Rinisë dhe e Forumit të Gruas, i propozon kandidatët për delegatë në Kuvend të PSHDK-së, në nivel komune, në Kryesinë e BD-PSHDK-së, respektivisht në Kryesinë Qendrore, për delagatë të PSHDK-së.

Në një komunë mund të egzistojë vetëm një Bashkësi e degëve të PSHDK-së, një Forum i Rinisë dhe një Forum i Gruas.

Në një komunë ku nuk ka Bashkësi të degëve të PSHDK-së, degët i bashkohen komunës më të afërme ku egzistojnë këto Bashkësi të Degëve.

Këshillat e BD janë të lidhura me këshillat e Kryesisë së PSHDK-së për koordinim më të mirë të punës së tyre.

Bashkësia e Degëve të PSHDK-së ka vulën e vetë me emblemën e PSHDK-së, ndërsa Forumi i Rinisë dhe Forumi i Gruas, këtë vulë mund ta përdorin me autorizimin e Kryesisë së BD-PSHDK-së, rrespektivisht të Kryesisë Qendrore të PSHDK-së. Kryesia e Bashkësisë së degëve, në rast nevoje, ndihmon veprimtarinë partiake të Forumit të Rinisë e të Forumit të Gruas dhe e kundërta.

Kryetarët e këtyre forumeve janë anëtarë të Kryesisë së BD-PSHDK-së dhe në mungesë të kryetarit, nënkryetari i këtyre forumeve marr pjesë në mbledhjen e Bashkësisë së Degëve me të drejtë vote.

Kryetari, ose nënkryetari i Kryesisë së BD, gjithashtu merr pjesë në mbledhjet e Kryesisë të këtyre forumeve, me të drejtë vote.

Kryetari i Forumit të Rinisë dhe i Forumit të Gruas është anëtar i Këshillit Qendror të PSHDK-së dhe këto asociacione i kanë delegatët e vet në Kuvendin e PSHDK-së, numrin e të cilëve e propozon Kryesia e BD-PSHDK-së në bazë të numrit të anëtarëve të terrenit dhe këtë e miraton Kryesia e PSHDK-së.

Shpenzimet materiale dhe financiare për zyre dhe fushëveprimtaritë aktive të Kryesive të BD-PSHDK-së janë kompetencë dhe obligim i Kryesisë se PSHDK-së, të caktuara sipas Rregullorës së Kryesisë së PSHDK-së.

Kryetarët, nënkryetarët dhe sekretarët e BD-PSHDK-së për punët sipas funksionit, kanë të drejtë në paga mujore të caktuar sipas Rregullorës së Kryesisë të PSHDK-së.

Organet ekzekutive të nëndegëve, degëve, bashkësisë së degëve, Forumit të Rinisë dhe të Gruas janë: Kuvendet, kryesitë dhe kryetarët.

Neni 27

KUSHTET PËR THEMELIMIN E DEGËS JANË:

Formimi i këshillit iniciativ dhe hartimi i regjistrit prej më së paku 51 anëtarëve, kurse degët në diasporë prej më së paku 26 anëtarëve.

Këto lista, bashkë me proçesverbalin përkatës nga mbledhja, dhe me kërkesë për miratim, i dërgohen Kryesisë së PSHDK-së, e cila merr vendim për themelimin e degës, pas konsultimit me BD përkatëse.

Në rastet kur Kryesia e Bashkësisë së degëve nuk pajtohet me themelimin e degës së re, Kryesia e PSHDK-së, pas shqyrtimit të rrethanave objektive, merr vendim përkatës.

Neni 28

Kryesia e PSHDK-së, në raste të caktuara, kur e vlerëson të domosdoshme ndërhyrjen për mirëvajtjen e punëve të Partisë, përkatësisht kur e konstaton se nëndegët, degët ose BD veprojnë kundër Programit dhe Statutit të PSHDK-së dhe vendimeve e qëndrimeve të Kryesisë së PSHDK-së, i propozon Këshillit Qendror materialin me argumente dhe prova që të merr vendim për shkarkimin dhe shpalljen e kuvendit të jashtëzakonshëm të tyre.

Në raste të ngjajshme, Kryesia e PSHDK-së, përmes vendimit të marrë nga Këshilli Qendror, shkarkon edhe anëtarin apo Kryesinë e Bashkësive të degëve, përkatësisht të Forumit të Rinisë ose të Forumit të Gruas, gjegjësisht ndonjë anëtar të tyre që është fajtor, por gjithmonë këtë e bazon në argumente dhe prova.

Marrëdhëniet e veprimet eventuale të Bashkësisë së degëve, të Forumit të Rinisë ose të Forumit të Gruas me subjekte politike, organizma dhe organizata të tjera, mund të bëhen vetëm me pëlqimin e Kryesisë së PSHDK-së për çështje dhe punë konkrete.

Veprimtaria e subjekteve të përmendura këtu, sipas Statutit të Partisë, zhvillohet vetëm brenda territorit të komunës.

Kundër vendimit të Kryesisë, i miratuar nga Këshilli Qendror, ankesa mund t’i paraqitet Kuvendit të PSHDK-së, përmes Kryesisë së PSHDK-së, në afatin prej 30 ditësh.

Neni 29

VEPRIMTARIA MATERIALO-FINANCIARE

PSHDK-ja mjetet financiare i siguron prej anëtarësisë së obligueshme nga anëtarët e vet, donatorët, dhuratat, kontributet dhe burimet e tjera.

Nga anëtarësia e mbledhur, Bashkësive të degëve të PSHDK-së, pastaj Forumit të Rinisë dhe Forumit të Gruas u takojnë 30% nga shuma e mjeteve të grumbulluara.

Shumën dhe kushtet e pagesës së anëtarësisë dhe shfrytëzimin e tyre, e përcakton Kryesia e PSHDK-së me rregullore të posaçme, në marrëveshje paraprake me Këshillin Qendror.

Kryetari i PSHDK-së i ka të gjitha kompetencat për nënshkrimin e akteve financiare në emër të Partisë, apo zëvendësi i autorizuar me shkrim, ose ndonjëri nga anëtarët e autorizuar nga Kryesia.

Punët tjera të arkës i kryen arkëtari i Partisë, i zgjedhur nga Kryesia, që ngarkohet me mjete financiare (të gatshme-pety cech).

Neni 30

Mënyra e sigurimit të mjeteve financiare dhe e shfrytëzimit të tyre i nënshtrohen kontrollit të rregullt dhe verifikimit publik partiak. Kryesia e emron Komisionin mbikëqyrës financiar dhe për këtë e njofton Këshillin Qendror se paku një muaj para mbajtjes se Kuvendit dhe raportan në Kuvendin e PSHDK-së në mbledhjen vijuese.

Neni 31

PUSHIMI I EKZISTIMIT TË PSHDK-së

PSHDK-ja pushon së vepruari me vendimin e Kuvendit të PSHDK-së në pajtim me ligjin, kur numri i anëtarësisë bie nën numrin e përcaktuar me ligj, por edhe kur mungojnë mjetet materiale për veprimtarinë e saj të mëtejme.

Neni 32

PASURIA E PSHDK-së NË RAST TË PUSHIMIT APO SHUARJES SË PARTISË

Nëse ndodhë pushimi i veprimtarisë së PSHDK-së, përkatësisht nëse ajo shuhet, mjetet themelore të saj shiten përmes ankandit publik dhe me vendimin e Kuvendit të PSHDK-së, së bashku me mjetet e tjera financiare të Partisë, i takojnë Republikës së Kosovës.

Neni 33

Propozimin për plotësimin apo ndryshimin e Statutit të Partisë e jep kryetari, Kryesia, Këshilli Qendror, këshilli për çështje juridike apo Kryesia e Bashkësië së Degëve të PSHDK-së.

Neni 34

Ky Statut hyn në fuqi ditën e miratimit në Kuvendin e PSHDK-së dhe duhet të jetë i  protokoluar dhe i nënshkruar nga kryetari i PSHDK-së.

Kuvendi Zgjedhor
Prishtinë, 7 qershor 2008